Жаҳоннинг энг қимматбаҳо футболчиси Криштиану Роналду бу мавсумни «қуруқ» ўтказмоқчи эмас ва ҳозирда иштиёққа тўлиб-тошган. Ҳужумчи «Қироллик клуби»нинг улкан ғалабаларга эришишига шубҳа қилмаяпти.

У буни мухбирлар билан суҳбатларда ҳам баралла айтмоқда.

- Аввалги мавсумларга солиштирганда майдондаги ўрнингиз бироз ўзгаргандай туюлмоқда...

- Ҳеч қандай ўзгариш бўлмади. Мавсум эндигина бошланди ва майдонда ўзим учун қулай жойдаман. Гол урмаган бўлсамда, 2-3та хавфли вазиятлар содир этдим. Умид қиламанки, голларим ҳали олдинда...

- Флорентино Перес жорий мавсумда клуб олдига қўйилган асосий мақсад - Чемпионлар Лигаси кубогини қўлга киритиш эканлигига алоҳида урғу беряпти...

- Ҳар йили ЧЛ ва яна фақат ЧЛ ҳақида гапиришади... «Реал» имкониятларидан келиб чиқсак, бу турнир ғолиблигига доимо даъвогармиз, таъкидлайвериш шарт эмас. Кубокни эгаллаш учун аввало, гуруҳ босқичи ҳақида ўйлаш керак. Кейин аста-секин чўққи сари қадам ташланади.

- Ҳарқалай, жамоа Жозе Моуриньо раҳнамолигида янада яхшироқ ўйнаса керак-а?

- Бунга ишончим комил. У дунёдаги энг яхши мураббийлар сирасига киради. Биз Жозе билан кутилган чўққиларни забт этамиз. Бу орзум янаги мавсумга қолиб кетмайди.

- Нимага асосланиб бунчалик ишонч билан гапиряпсиз?

- Сиз бундай туйғуни ҳис қилмаганмисиз? Биз албатта, бирор-бир турнирда шоҳсупага кўтариламиз. Мен буни ҳозирдан сезяпман...

- Бу билан «Барселона» жорий мавсумда бироз кучсиздай кўриняпти, демоқчимасмисиз?

- Йўқ. Ла-лига эндигина старт олди. Мағлубиятга учрамайдиган жамоа бўлмайди. «Барса» каби биз ҳам қимматли очколарни бой беришимиз мумкин. Кўриниб турибдики, «кичик» жамоалар ҳам грандларни оғир аҳволга солиб қўйишлари ҳеч гап эмас.

- «Барса»нинг мағлубиятини эшитиб ҳайрон қолгандирсиз?

- Очиғини айтсам, ҳайрон бўлиш баробарида «Эркулес»га қойил қолдим. Ахир буни ҳеч ким кутмаганди-да. Ўйинни эса кўрмадим, негаки, «Барса» мени ҳозирда ташвишга солмаяпти.

- Фикрингизча, Португалия термасига португалиялик мутахассис бош мураббий бўлгани яхшими ёки чет эллик?

- Ҳамма билади, охирги вақтларда термамиздаги вазият чигаллашиб кетди. Бироқ ҳозир мен учун энг муҳими, Чемпионлар Лигаси. Фақат шу ҳақда ўйлаяпман. Миллий термамиз ишларига айни вақтда баҳо бермоқчи эмасман. Бунинг учун кейинги йиғинлар чоғида имконият туғилади. Такрорлайман, ҳозирда мени энг қизиқтирган нарса - бу Чемпионлар Лигаси.